نصائح ذهيبه لكى قب استعمال الماسكات

بما اننا بندى تركيبات عدد من الماسكات فكان لزاما ان نعطى قواعد علمية عند استخدام الماسكات ..وده جاء برضو نتيجة كم سؤال من كم عضوة فى الجروب ...فقررت ان يكون اليوم ذكر القواعد الذهبية التى لابد من تطبيقها عند استخدام ماسك عموما ...طبعا فى حاجات تخص ماسكات بعينها نذكرها عند ذكر هذه الماسكات ...هحاول اختصر و اضعها فى نقط كى يستفيد الجميع

1- احتياطات عامة :

* لا تستخدمى الماسكات على جلد به عدوى ..يعنى مثلا جلد به مرض ناتج عن عدوى كالجدرى و الجديرى و نحوه

* لا تستخدمى ماسك على جلد به حروق شمس ..الجلد بيبقى ملتهب و يحتاج الى معاملة خاصة ذكرتها انا فى سلسله  الشمس و البشرة

*لا تستخدمى ماسك على جلد به قطع او جرح او نحوه محتاجين جلد سليم و غير مصاب

* لا تستخدمى ماسك على بشرة حساسة جدا الا بعد اجراء اختبار بسيط على مساحة بسيطة لانه فى الاخر حتى لو الماسك طبيعى و جميل فطبيعى لا يعنى انه خامل ..لا طبعا ده فيه كثير من المواد الفعالة الطبيعية نعم ولكنها مازالت موادا فعالة

2- الخطوات الصحيحة لعمل ماسك :

* من الضرورى جدا تنظيف الجلد من كل الاتربة و الطبقات اللى عليه خاصة الميك اب ...لا تتركى اثرا للميك اب قبل عمل الماسك لانه لو حطيتى ماسك فوق ميك اب سيؤثر سلبا على الجلد و المسامات و سيؤدى لالتهاب جلدى احيانا ..من الممكن ايضا ان يتفاعل الماسك بمكوناته مع الميك اب فتكون اشكالية ممكنة ...نضفى البشرة تماما ...ولكن برضو بلطف ....مش هنعالج التهاب ...بالتهاب

* يفضل استخدام حمام بخار للوجه قبل وضع الماسك ..حمام بخار لطيف ...ثم انتظرى لحظات بعده لوضع الماسك ...لو حسيتى ان حمام البخار كان قوى او متعملشى صح ....متحطيش الماسك ...انا دايما بنصح بمية دافيه على فوطة نظيفة جدا و تترك على البشرة لحظات ..ثم يكرر ذلك لو مفيش امكانية لحمام البخار و هو بديل جيد جدا

* توضع طبقة خفيفة من الماسك باطراف الاصابع مش محتاجة حضرتك تحطى طن ماسك يعنى علشان يجيب نتيجة ...طبقة خفيفة ...يعنى فى طبيقة مش لحسة ..و خفيفة يعنى مش جبال

* اربطى شعرك قبل وضع الماسك لانه لو سايباه هيتعبك جدا و يلزق فى الماسك احيانا و يخليكى تشيلى الماسك ونتى متنرفزة

* فترة ترك الماسك تتراوح من عشر دقايق الى تلت ساعة حسب نوع الماسك و طبيعة الجلد (اصحاب البشرة الحساسة يحتاجون غالبا الى عشر دقايق الى خمس عشرة دقيقة و اصحاب البشرة الدهنية يحتاجون الى تلت ساعة واحيانا نص الا خمسة )

* تجنبى منطقة العين وما حولها لانها حساسة جدا و لا تحتاج الى ماسكات اصلا الا فى حالات محددة و خامات محددة مش كل ماسك ينفع يتحط هنا

* لو حسيتى باى شىء غير طبيعى بعد وضع الماسك ..غير طبيعى يا جماعة مش كل شد او نشفان نترعب ...غير طبيعى يعنى سخونة شديدة تورم اكلان جامد كدة يعنى وده غالبا بيبقى نادر جدا و لاصحاب البشرة الحساسة جدا

*خليكى ريلاكس اثناء وضع الماسك و مش عمالة تجرى هنا و تروحى تشوفى الطبيخ و تحطى الغسيل فى الغسالة ..لا لا ...ريلاكس ...ميلى راسك للخلف ...اسمعى شوية قران ...او حمزة نمرة ..حاجة تدى معنى و لا تحدث هدما اخلاقيا و شرخا ادبيا

* الماسكات تستخدم على احسن تقدير مرتين اسبوعيا ....اول الأسبوع و آخره كدة يعنى

* تأكدى من ازالة الماسك بعد الفترة القانونية ...حبة ماء دافى ...لا تتركى اثرا للماسك او مواده

* استخدمى مرطب خفيف بعد الماسك

* انظرى الى المرآة ..وقولى ...اللهم حسن خلقى كما حسنت خلقتى

* ضعى عطرا جميلا ....